膠袋徵費實行已久，大家本應全部習慣了向膠袋說不，或者意識到自己的雙手雙臂其實很發達，有能力成功拎住幾件物品返到屋企都冇穿冇爛，要少個膠袋包住凍食，隻手只會濕少少而唔會受傷。可是仍然偶有見到前面排隊俾錢位顧客仍然係咁要膠袋，拎住個 MIU MIU 買張卡係都要套多個膠袋，買包百力滋都要用袋入住先拎到、難道放入袋會重斷臂？那不只是浪費，是愚也。
人類自古以來就是透過運用身邊不同的資源來解決生活上的問題，但係到今時今代，電腦發展就叫先進，人腦就倒退得更愚頓，生活上的問題往往要現成的 solution，個腦轉唔到彎諗唔到計，老一輩教落的民間智慧沒有留低。文明人的文明思維唔係研發更多新產品、靚東西，而係識得點樣以一個簡單的方法解決好多個問題 —— 尤其是在這個根本負擔不起五花五門的氣候危機年代。
所以請不要再講唔要膠袋，選購環保購物袋，而係拎出袋內或頸上的絲巾 / 頸巾，自紮包袱。
那本應該是我們最耍家的做法，自古以來都不知幾多人研究出幾多方法紮到曉飛，而且一大你挑過揀過的靚布絕非那些醜樣環保袋可以媲美。加上你未必會記得帶環保袋，但你絕可能會記得帶定塊披肩入商場雪廠。依個方法會唔會容易養成習慣得多？
2006年日本環保省製作一幅風呂敷（Furoshiki）教學圖，提倡國民用一塊布代替膠袋。當時環保省長說過這樣一番話：
I’ve created what you might call a “mottainai furoshiki”. The Japanese word mottainai means it’s a shame for something to go to waste without having made use of its potential in full.
一塊圍巾，基本上可以包任何物品。最好的設計，就是你根本經過幾多年都唔需要有新設計。我們可不可以行快返些少，還原基本步？