離開請乾杯

平日在街上忽然口渴,你會點?當然係立即走入「梗有一間o係左近」買枝膠樽野飲,飲唔晒會拎住或者擺入袋,飲晒就o係下一個垃圾桶與之訣別。一個好簡單同理所當然的償渴行為對環境有咩影響,即使你心知肚明都未必會令卻步。我地會付錢,要環境付出代價來滿足我們一刻的口渴,但係免費享用的水,好多時卻偏偏浪費掉?

在餐廳 / 茶樓被免費提供茶水時,幾多人會認真乾晒佢先離開?我們一直以來都有個習慣,就係我們「光顧」享用的食物同飲品係可以有剩的,好似食肆向我們提供,就不是要求我們完全清光才走。但係你有冇諗過,你留下來的茶水之後會點樣?怕且你不會以為有人幫你吞下呱?然後,一大杯水、一大壺茶就咁浪費掉。雖然我們當中好多都未經歷過「制水」的年代,但係唔擔保這些日子不會來臨。唔講制唔制水,上一代自細教落的「折墮」兩個字,你還記得嗎?在這個氣候問題急於眉睫的年代,還給我們浪費分毫資源的資格嗎?

我們還是學生時,尚會帶個水樽返學。有些老人家會帶著瓶子,在茶樓倒走剩低的茶。在這個年代,我們是否應該培養這個習慣呢?這對你來講可能是一個好難培養的習慣,但係我們難度有資格為了縱容惰性,而放棄培養一個充分運用資源的習慣嗎?

除非你在街上不會口渴,不會走入「梗有一間o係左近」買枝膠樽野飲,否則出街前裝定枝水,但食肆裡倒走剩低的茶水,不是一個很理所當然要做的事嗎?既然我們可以不嫌其煩地走入便利店、拎野飲、俾錢、飲完拎住/放入袋或搵垃圾桶,就做唔到不嫌其煩地出街時帶個水樽o係身嗎?

人係習慣的動物。既然我們已經開始去星巴克時帶 Tumbler,買外賣時帶食物盒,就好應該再做多一步:帶水樽、倒走在食肆飲剩的茶水。

Leave a Reply